Anandini – April 2018

ಏಪ್ರಿಲ್ ನ ಸಂಚಿಕೆ ತಾಂತ್ರಿಕ ಕಾರಣಗಳಿಂದಾಗಿ ಈಗ ಹೊರಬರುತ್ತಿದೆ. ಆನಂದಿನಿಗೆ ಇಷ್ಟು ದಿನ ಅಜ್ಞಾತವಾಸ.

ಈ ಮಧ್ಯದ ಅನೇಕ ವಿಷಯಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಬೇಕಿದೆ.

ಏಪ್ರಿಲ್ ನಲ್ಲಿ ನಡೆದ ಎಸ್.ಎಸ್.ಎಲ್.ಸಿ ಪರೀಕ್ಷೆಯನ್ನು ಪೂರ್ಣಪ್ರಮತಿಯ ಪ್ರಥಮ ತಂಡದ ಹತ್ತು ಮಕ್ಕಳು ತೆಗೆದುಕೊಂಡಿದ್ದು ಶೇಕಡ ನೂರು ಶ್ರೇಷ್ಠದರ್ಜೆಯ ( distinction) ತೇರ್ಗಡೆಯ ಫಲಿತಾಂಶ ಬಂದಿದೆ. ಏಳು ಮಕ್ಕಳು ಶೇಕಡ ೯೦ – ೯೭ರ ಅಂಕ ಗಳನ್ನು ಪಡೆದಿದ್ದಾರೆ. ಹತ್ತಾರು ಪಠ್ಯೇತರ ಚಟುವಟಿಕೆಗಳನ್ನು ನಡೆಸುತ್ತ, ಪಾಠಕ್ರಮದಲ್ಲೂ ಹೊಸ ಪ್ರಯೋಗಗಳನ್ನು ಮಾಡುತ್ತ ಅದರ ಹಿನ್ನೆಲೆಯಲ್ಲಿ ಪುಸ್ತಕದ ಬದನೇಕಾಯಿಯಾಗದೆಯೂ ಇಷ್ಟೆಲ್ಲಾ ಅಂಕಗಳನ್ನು ಪಡೆಯಬಹುದು ಎನ್ನುವ ನಮ್ಮ ಯೋಜನೆ ಸಫಲವಾಗಿದೆ. ಇದು ಒಂದು ರೀತಿಯಲ್ಲಿ ಇತರರಿಗೂ ಮಾದರಿಯಾಗಬಹುದೇನೊ!

೨೦೧೮ ಜೂನ್ ನಲ್ಲಿ ಪೂರ್ಣಪ್ರಮತಿ ಒಂಭತ್ತನೇ ವರ್ಷಕ್ಕೆ ಕಾಲಿಟ್ಟಿದೆ. ಎರಡೂವರೆ ವರ್ಷದಿಂದ ಹನ್ನೊಂದು ವರ್ಷದ ವರೆಗೆ (೬ನೆಯ ತರಗತಿ) ಮಾಟೆಸ್ಸೊರಿ ಪದ್ಧತಿ, ನಂತರದ ತರಗತಿಗಳಲ್ಲಿ ರಾಜ್ಯಪಠ್ಯಕ್ರಮ ಪದ್ಢತಿ ಹಾಗೂ ಮಾಗಡಿ ರಸ್ತೆಯ ಆನಂದವನ ಗುರುಕುಲಗಳು ಯಶಸ್ವಿಯಾಗಿ ನಡೆಯುತ್ತಿವೆ. ಇದಕ್ಕೆ ನಿಮ್ಮೆಲ್ಲರ ಆಶೀರ್ವಾದ, ಪ್ರೋತ್ಸಾಹಗಳೇ ಕಾರಣ.

ನಮ್ಮ ಮಾರ್ಗದರ್ಶಕ ಗುರುಗಳಲ್ಲಿ ಒಬ್ಬರಾದ ಶ್ರೀ ಜ್ಞಾನಸ್ವರೂಪ ಸಾನಂದ ಸ್ವಾಮೀಜಿಯವರು ಹರಿದ್ವಾರದಲ್ಲಿ ಗಂಗೆಯ ನಿರಂತರತೆ, ಅವಿರಲತೆಯ ಬಗೆಗೆ ನಿರ್ಣಾಯಕ ಫಲಿತಾಂಶಕ್ಕಾಗಿ ತಮ್ಮ ಜೀವವನ್ನೇ ಪಣವಾಗಿಟ್ಟು ಆಮರಣಾಂತ  ಉಪವಾಸದ ತಪಸ್ಸು ಪ್ರಾರಂಭಿಸಿದ್ದಾರೆ. ಈಹೊತ್ತಿಗೆ ಉಪವಾಸ ಪ್ರಾರಂಭವಾಗಿ ೬೭ ದಿನಗಳು ಸಂದಿವೆ. ಆನಂದವನದ ಮಕ್ಕಳು ಶ್ರೀನಿವಾಸ್ ಅವರ  ನೇತೃತ್ವದಲ್ಲಿ ದೆಹಲಿ ಹಾಗೂ ಹರಿದ್ವಾರಕ್ಕೆ ಹೋಗಿ ಅವರೊಡನೆ ತಾವೂ ಗಂಗಾ ತಪಸ್ಸಿನಲ್ಲಿ ಪಾಲ್ಗೊಂಡು ಹಿಂದಿರುಗಿದ್ದಾರೆ.

ಈ ಹಿನ್ನೆಲೆಯಲ್ಲಿ, ಬನ್ನಿ,ಈ ಸಂಚಿಕೆಯನ್ನು ಓದೋಣ.

ಶಶಿರೇಖಾ ಮಣೂರ್,

ಸಂಪಾದಕರು.

೦೪ ಫೆಬ್ರವರಿ ೨೦೧೮ರಂದು ಕುವೆಂಪು ಕಲಾಕ್ಷೇತ್ರದಲ್ಲಿ ಪೂರ್ಣಪ್ರಮತಿ ತನ್ನ ಎಂಟನೆಯ ವಾರ್ಷಿಕೋತ್ಸವ “ಪೂರ್ಣಪ್ರಮತಿ ಉತ್ಸವವನ್ನು” ಆಚರಿಸಿತು. “ಭಕ್ತಿ” ಎಂಬ ಸಂವತ್ಸರಸೂತ್ರವನ್ನು ಆಧರಿಸಿ ಭಕ್ತಿಪಂಥದ ಶ್ರೇಷ್ಠ ಸಾಧಕರ ಜೀವನ ಸಾಧನೆಯನ್ನು ಮಕ್ಕಳು ವೇದಿಕೆಯ ಮೇಲೆ ಪ್ರದರ್ಶಿಸಿದರು. ಪೂರ್ವಪ್ರಾಥಮಿಕ ಮಕ್ಕಳು ಕನಕದಾಸ, ಆಂಡಾಳ್, ತ್ಯಾಗರಾಜರನ್ನು ರಂಗಮಂಚಕ್ಕೆ ಕರೆತಂದರೆ, ಪ್ರಾಥಮಿಕ ಮಕ್ಕಳು ಪುರಂದರದಾಸರು ಹಾಗೂ ಅಣ್ಣಮಾಚಾರ್ಯರನ್ನು ಜೀವಂತಗೊಳಿಸಿದರು.

ಮುಖ್ಯ ಅತಿಥಿಗಳಾಗಿ ಪೇಜಾವರ ಅಧೋಕ್ಷಜ ಮಠದ ಶ್ರೀ ವಿದ್ಯಾಪ್ರಸನ್ನ ತೀರ್ಥರು, ಸೋಸಲೆ ವ್ಯಾಸರಾಜ ಮಠದ ಶ್ರೀ ವಿದ್ಯಾಶ್ರೀಶ ತೀರ್ಥರು, ಸಾನಂದ ಸ್ವಾಮೀಜಿ, ತಿರುಪತಿ ತಿರುಮಲದ ಅಣ್ಣಮಾಚಾರ್ಯ ಪ್ರಾಜೆಕ್ಟ್ನ ನಿವೃತ್ತ ಮುಖ್ಯಸ್ಥರಾದ ಶ್ರೀ ಗರಿಮೆಲ್ಲ ಬಾಲಕೃಷ್ಣ ಪ್ರಸಾದ್, ನಾಗ್ಪುರದ ಕಾಳಿದಾಸ ಸಂಸ್ಕೃತ ವಿಶ್ವವಿದ್ಯಾಲಯದ ಉಪಕುಲಪತಿಗಳಾದ ಶ್ರೀ ಶ್ರೀನಿವಾಸ ವರಖೇಡಿಯವರು, ಅದಮ್ಯ ಚೇತನದ ಶ್ರೀಮತಿ ತೇಜಸ್ವಿನಿ, ಬಿ.ಪಿ.ಆರ್.ಎಲ್.  ಔಷಧಿ ತಯಾರಕ ಸಂಸ್ಥೆಯ ಶ್ರೀ ಜಯಪ್ರಕಾಶ್ ಮಡಿ, ನಿವೃತ್ತ ನಾಸಾ ವಿಜ್ಞಾನಿ ಶ್ರೀ ಶ್ರೀನಿವಾಸ್ ರವರು ಉಪಸ್ಥಿತರಿದ್ದರು.

ಪೂರ್ಣಪ್ರಮತಿಯ ಎಲ್ಲಾ ವಿಭಾಗಗಳಲ್ಲಿ ಸೀತಾಜಯಂತಿಯನ್ನು ಮಾತೆಯರ ದಿನವನ್ನಾಗಿ ಆಚರಿಸಲಾಯಿತು.

ಪೂರ್ವಪ್ರಾಥಮಿಕದ ಕೊನೆಯ ವರ್ಷ (ಎಮ್೩), ಪ್ರಾಥಮಿಕ ೩ನೆಯ ತರಗತಿ, ಹಿರಿಯ ಪ್ರಾಥಮಿಕ ೭ನೆಯ ತರಗತಿ ಹಾಗೂ ೧೦ನೆಯ ತರಗತಿಯ ಘಟಿಕೋತ್ಸವವನ್ನು ಹೃದಯಸ್ಪರ್ಶಿಯಾಗಿ ಆಚರಿಸಲಾಯಿತು.

ಫಾಲ್ಗುನ ಮಾಸದ ಪ್ರತಿಪತ್ ತಿಥಿಯಂದು ಮಕ್ಕಳು ನೈಸರ್ಗಿಕ ಬಣ್ಣಗಳಿಂದ ಹೋಲಿ ಹಬ್ಬವನ್ನು ಸಂಭ್ರಮದಿಂದ ಆಚರಿಸಿದರು.

ಮಾರ್ಚ್ ತಿಂಗಳ ಮೊದಲ ಶನಿವಾರದಂದು IISc Open Dayಗೆ ಭೇಟಿ ಕೊಟ್ಟು ವಿಜ್ಞಾನದ ಹೊಸ ಆವಿಷ್ಕಾರಗಳನ್ನು ಪರಿಚಯಿಸಿಕೊಂಡರು.

ಅಗ್ನಿಹೋತ್ರಿಗಳು ಈ ಕಾಲದಲ್ಲಿ ಬಹಳ ವಿರಳ. ವೈದಿಕ ಸಂಪ್ರದಾಯದಂತೆ  ಅಗ್ನಿಯಪ್ರಾದುರ್ಭಾವ ಹಾಗೂ ಅದರ ಸಂರಕ್ಷಣೆಯ ಪ್ರಕ್ರಿಯೆ ಬಹಳ ವಿಶೇಷವಾದದ್ದು. ಈಗಿನ ಕಾಲಕ್ಕೆ ಆ ಪ್ರಕ್ರಿಯೆಯನ್ನು ತಿಳಿದು ಅದರಂತೆ ಅಗ್ನಿಯನ್ನು ಸಂರಕ್ಷಿಸಿ ಪ್ರತಿದಿನ ಅಗ್ನಿಹೋತ್ರಾದಿಗಳಲ್ಲಿ ತೊಡಗಿಕೊಳ್ಳುವವರು ಬಹಳ ಅಪರೂಪ. ನಮ್ಮ ಶಾಲೆಯ ಮಕ್ಕಳು ಅಂತಹ ಅಗ್ನಿಹೋತ್ರಿಗಳಾದ ಶ್ರೀ ಸುಬ್ರಾಯ ಶರ್ಮಾ ಅವರ ಬಳಿ ಹೋಗಿ, ಆ ಪ್ರಕ್ರಿಯೆಗಳನ್ನು ಪ್ರತ್ಯಕ್ಷ ನೋಡಿ ಆ ಜ್ಞಾನವನ್ನು ಪಡೆದರು. ಇದರ ಬಗ್ಗೆ ವಿದ್ಯಾರ್ಥಿಯೊಬ್ಬ ಬರೆದ ಲೇಖನವೊಂದನ್ನು ಈ ಸಂಚಿಕೆಯಲ್ಲಿ ಪ್ರಕಟಿಸಲಾಗಿದೆ.

ವಿದ್ಯಾರ್ಥಿಗಳಿಗೆ ಗ್ರಂಥಾಲಯ ವಿಜ್ಞಾನದ ಪರಿಚಯ ಮಾಡಿಕೊಡಲು ಹಾಗೂ ಗ್ರಂಥಾಲಯದ ಪ್ರಯೋಜನ ಪಡೆಯುವಂತೆ ಪ್ರೇರೇಪಿಸಲು ವಿದ್ಯಾರ್ಥಿಗಳನ್ನು ಮಿಥಿಕ್ ಸೊಸೈಟಿ ಗ್ರಂಥಾಲಯಕ್ಕೆ ಮಾರ್ಚ್ ತಿಂಗಳ ಮೊದಲವಾರದಂದು ಕರೆದುಕೊಂಡು ಹೋಗಲಾಯಿತು.